Հայաստանի Հայ Կաթողիկէ Եկեղեցւոյ պաշտօնական կայքէջէն կը տեղեկանանք, որ Աստուծոյ կամքով եւ Արհի. Տ. Ռաֆայէլ Արքեպս. Մինասեանի օրհնութեամբ, Մեծ Սեպասար համայնքին համար սկսած է տպագրուիլ կաթողիկէ հոգեւոր պարբերաթերթ, որը կը կրէ գիւղի եկեղեցւոյ անունը՝ «Սուրբ Փրկիչ»:
Փոքրածաւալ թերթը լոյս կը տեսնէ ամէնամսեայ կամ երկամսեայ պարբերականութեամբ: Թերթը կազմելու աշխատանքները առ այժմ ստանձնած է գիւղի ժողովրդապետ՝ Տէր Յովսէփ քհնյ. Գալստեան, աջակցութեամբ մեծսեպասարցիներու, որոնք հետաքրքրուած են գիւղի հոգեւոր նկարագրի առաւել զարգացումով եւ հոգեւոր աւանդոյթներու պահպանումով:
«Թերթը նաեւ միջոց է՝ Աստուծոյ խօսքը, քահանայի ասելիքը հասցնելու համայնքի բնակիչներուն, մանաւանդ, այս օրերուն, երբ տուներ այցելելու հնարաւորութիւն գրեթէ չկայ» նշուած է վերոնշեալ տեղեկատուութեան մէջ :
Թերթը անվճար կը բաժնուի բոլոր բնակիչներուն:
Թերթի տպագրութիւնը կը վայելէ Արհի. Տ. Ռաֆայէլ Արքեպս. Մինասեանի եւ Հայկական Կարիտաս բարեսիրական կազմակերպութեան հովանաւորութիւնը։
Թերթի ելեկտրոնային PDF տարբերակին կրնաք հետեւիլ հետեւեալ կայքով
Վատիկան Նիուզ