ԱՐԺ․ ՏԷՐ ԿՈՄԻՏԱՍ ՔՀՆՅ․ ԴԱՒԷԵԱՆ
————————————————————
Վերջերս շատ եմ մտածել ու փորձել ինչ-որ բան հասկանալ, որովհետեւ այս անհեթեթ իրավիճակը որի մէջ թաթախուած ենք, պէտք է որ ինչ-որ իմաստ ունենայ: Մի պահ երեւակայեցի որ Վիրուսը խօսելու ունակութեամբ օժտուած լինէր եւ պատկերացրեցի թէ ինչ կը կարողանար մեզ ասել ինչ-որ նամակի միջոցով: Եւ սրանք են այն խօսքերը որ կարողացայ գրի առնել թղթի վրայ:
Բարեւ, ես COVID-19-ն եմ, ձեզնից շատերն ինձ կը ճանաչեն որպէս Քորոնա Վիրուս (Թագակիր Վիրուս): Այո, դա իսկապէս ես եմ: Կը ներէք որ առանց կանխազգուշացման եմ եկել, բայց ինձ թոյլ չէր տրուած տեղեակ պահել թէ ե՞րբ կամ ի՞նչ կերպարանքով կամ ի՞նչ ուժգնութեամբ կը ներկայանայի ձեր առջեւ: Լաւ: Իսկ ինչո՞ւ եմ այստեղ:
Դէ, ասեմ որ այստեղ եմ, որովհետեւ յոգնել էի այն պատկերից որ փոխանակ տեսնէի ձեր առաջխաղացումը, ականատեսն էի դառնում ձեր յետընթացին՝ ձեր ձեռքերով ինքներդ ձեզ քայքայելուն:
Յոգնել էի այն փաստից թէ ինչպէս էք վերաբերւում ձեր մոլորակի հետ, ինքներդ ձեզ հետ, միմեանց նկատմամբ:
Յոգնել էի ձեր անարդարութիւններից, ձեր բռնութիւններից, պատերազմներից, ձեր ներանձնական կոնֆլիկտներից եւ ձեր նախապաշարումներից:
Յոգնել էի ձեր սոցիալական նախանձներից, ճարպիկութիւններից, ձեր կեղծաւորութիւնից ու եսասիրութիւնից:
Յոգնել էի այն փաստից, որ ինքներդ ձեզ շատ քիչ ժամանակ էք տրամադրում, որ մոռանում էք ընտանիքի մասին, որ անուշադրութեան էք մատնում ձեր զաւակներին:
Յոգնել էի ձեր մակերեսային մտածելակերպից, որ շատ յաճախ արժեւորում էք չնչին իրողութիւնները եւ մոռանում էականները:
Յոգնել էի ձեր մտասեւեռուած, սրտնեղած փնտռտուքներից թէ ինչպիսի զգեստ պիտի կրէք, կամ ինչ հեռախօս պիտի գնէք կամ որ մեքենան պիտի վերցնէք, որպէսզի ձեզ թուացեալ կայունութիւն պարգեւէք:
Յոգնել էի ձեր դաւաճանութիւններից, ձեր ապատեղեկատուութիւնից, այն իրողութիւնից որ միմեանց հետ շփուելու ժամանակ գրեթէ չէք ունենում:
Չափազանց շատ էի յոգնել ձեր անվերջանալի բողոք-տրտունջներից, երբ մատ-մատի չէիք տալիս ձեր կեանքն աւելի բարելաւելու համար:
Յոգնել էի չնչին բաների պատճառով միմեանց մեղադրող ձեր հայեացքներից ու պահուածքից:
Յոգնել էի անվերջանալի քաղաքական պոռթկումներից եւ սխալ ընտրութիւններից:
Յոգնել էի տեսնել թէ ֆութպոլային խաղի արդիւնքից մարդիկ ինչպէս են միմեանց հայհոյում եւ նոյնիսկ սպանում:
Գիտեմ, դաժան եմ լինելու ձեզ հետ, գուցէ չափից շատ, բայց չեմ կարող զիջումների գնալ: Ես վիրուս եմ, եւ իմ գործողութիւնները կեանքեր կ’արժենան, բայց ուզում եմ որ մէկընդմիշտ մի բան հասկանաք, որ պէտք է փոխէք ձեր ընթացքը ձեր իսկ բարիքի համար:
Այն պատգամը, որի համար ես հիմա այստեղ եմ, շատ պարզ է՝ ուզեցի ընդգծել ձեր մարդկային հասարակութեան թոյլ կողմերը, որպէսզի դրանք կարողանաք վերացնել:
Ամէն ինչ մի պահ կանգնեցրի, որպէսզի հասկանաք որ այսօրուանից յետոյ միակ կարեւոր բանը որին պէտք է ուղղէք ձեր ամբողջ կարողութիւնն ու էներգիան հետեւեալն է՝ կեանքը, ձեր եւ ձեր երեխաների կեանքը, եւ այն ամէնը՝ ինչն իսկապէս անհրաժեշտ է կեանքի պահպանման, գգուանքի եւ տարածման համար:
Ցանկացել եմ ձեզ մեկուսացնել, հեռաւորութեան վրայ պահել ձեր իսկ հարազատներից՝ տատիկներից, պապիկներից, ծնողներից, երեխաներից եւ թոռներից, բանտարկել ձեզ ձեր իսկ օջախներում, որպէսզի հասկանաք վերջապէս, թէ ինչքան թանկ է գրկախառնումը, մարդկային հպումը, երկխօսութիւնը, ձեռքսեղմումը, ընթրիքը ընկերների հետ, դրսում պարզապէս քայլելը կամ վազելը:
Ահա այս ժեստերից է որ ամէն ինչ նորովի պիտի սկիզբ առնի: Բոլորդ հաւասար էք, իրար մէջ տարբերութիւն մի դրէք: Ես ձեզ ապացուցեցի որ սահմաններ գոյութիւն չունեն: Շատ քիչ ժամանակում հազարաւոր քիլոմեթրեր անցայ առանց ձեր իմացութեան:
Ես անցողիկ եմ, սակայն այն մտերմութեան եւ համագործակցութեան զգացումը որ ստեղծեցի ձեր միջեւ կարճ ժամանակահատուածում, պէտք է դարեր յարատեւեն:
Պարզապէս ապրէ՛ք ձեր կեանքը, քայլէ՛ք, խորը շնչէք, բարի՛ք գործէք, քանզի բարին ձեզ ետ կը վերադառնայ տոկոսներով: Վայելէ՛ք բնութիւնը, արէք այն՝ ինչը ձեզ դուր է գալիս եւ գոհացնում է: Ամէն ինչ ներդրէք որպէսզի ուրիշից կախուած չլինէք:
Երբ դուք տօնէք, ես ձեզ արդէն լքած կը լինեմ, բայց յիշէք որ պէտք չէ լաւ մարդ խաղալ միայն իմ ներկայութեան ժամանակ:
Ես ձեզ հրաժեշտ եմ տալիս:
Քանաքեռ, Երեւան