Ինչպէս կը տեղեկանանք armenianchurch.com կայքէջէն, 2018 սեպտեմբերի 22-ին Արհի. Տ. Ռաֆայէլ Արքեպս. Մինասեան հովուական այցով մեկնեցաւ Լեհաստան: Սրբազան Հայրը հիւրընկալուեցաւ Վարշաւիայի Արքեպիսկոպոս Վսեմաշուք Կարդինալ Կազիմիեժ Նիչի (Kazimierz Nycz) նստավայրին մէջ: Նոյն օրը Վարշաւիայի Աստուածային նախախնամութեան եկեղեցիին մէջ տեղւոյն հայ համայնքին համար մատուցուեցաւ Սուրբ Պատարագ՝ ձեռամբ Արհի. Ռաֆայէլ Արքեպս. Մինասեանի, ներկայութեամբ Կարդինալ Նիչի եւ համապատարագութեամբ Վարշաւիայի հայ կաթողիկէներու ժողովրդապետ Գերյ. Հ. Հովսէփ ծ. վրդ. Նաումովիչի, Գերյ. Հ. Հենրիկ ծ. վրդ. Բլաշչիկի, Հոգշն. Հ. Նարեկ վրդ. Մնոյեանի և սպասաւորութեամբ Լեհաստան ուսանող հայ ճեմարանականներու: Սուրբ Պատարագին ներկայ էին նաեւ Լեհաստանի մօտ ՀՀ դեսպան Էդգար Ղազարեանը, Սբ. Հովհաննէս Պօղոս Բ. Քահանայապետի եւ Կարդինալ Վիշինսկի թանգարանի տնօրէն Մարտին Ադամչեւսկին, Լեհաստանի վարչապետի գրասենեակի պատասխանատուն, հայազգի սենատոր Լուկաշ Աբգարովիչը, պետութեան մօտ լեհահայ համայնքի պատասխանատու Էդուարդ Մերենջեյովիչը եւ հայ համայնքի ներկայացուցիչներ:
Սբ. Պատարագի աւարտին Արհի. Ռաֆայէլ Արքեպս. Մինասեանի ձեռամբ օծուեցաւ հայկական խաչքար մը՝ նուիրուած Սբ. Հովհաննէս Պօղոս Բ. Քահանայապետի 2001-ին Հայաստան այցելութեան պատմական իրադարձութեան եւ անոր գահակալութեան 50-րդ տարեդարձին (Սբ. Հովհաննէս Պօղոս Բ. Քահանայապետ ընտրուեցաւ 1978 հոկտեմբերի 16-ին և գահակալեց մինչև 2005 ապրիլի 2-ը): 2018-ը հոբելեանական է նաեւ Լեհաստանի պետութեան համար. կը լրանայ պետության պետութեան հիմնադրման 100-րդ տարեդարձը: Խաչքարի տեղադրումին նախաձեռնած են ՀՀ դեսպան Էդգար Ղազարեանը եւ Արհի. Ռաֆայէլ Արքեպս. Մինասեանը՝ ի գնահատումն ծագումով լեհ Սբ. Հովհաննէս Պօղոս Բ. Քահանայապետի հայրական սիրոյ եւ Լեհաստանի պետութեան յարգանքին՝ հանդէպ հայ ժողովուրդը, որ պատմական ներկայութիւն ունեցած է Լեհաստանի մէջ եւ իր համեստ աւանդը ունեցած է Լեհաստանի պետութեան, մշակոյթի, հոգեւոր աւանդութեան զարգացման մէջ:
Յիշեցնենք, որ Հայաստանի, Վրաստանի, Ռուսաստանի և Արեւելեան Եւրոպայի հայ կաթողիկէ առաջնորդութիւնը՝ որպէս այդ տարածքներուն վրայ վերածնեալ հայ կաթողիկէ համայնքներու հոգեւոր վարչութեան նոր միաւոր, ձեւաւորուեցաւ 1991 հոկտեմբերի 2-ին՝ Սբ. Հովհաննէս Պօղոս Բ. Քահանայապետի որոշմամբ եւ ուղղակի հովանաւորութեամբ: Իսկ մէկ տարի ետք, դարձեալ անոր հովանաւորութեամբ Աշոցքի մէջ բացուեցաւ Տիրամայր Նարեկի հիւանդանոցը: