2019-ի Աստուածայայտնութեան տօնին, Արհի. Տ. Ռաֆայէլ արքեպս. Մինասեան իր տօնական Սուրբ Պատարագը մատուցանած է Մոսկուայի Հայ կաթողիկէ համայնքին համար, Անարատ Յղութեան Կաթողիկէ Մայր Տաճարին մէջ, համապատարագութեամբ Ռուսաստանի առաջնորդական փոխանորդ, Մոսկուայի Հայ կաթողիկէներու ժողովրդապետ գերյ. Հ. Պետրոս ծ. վրդ. Եսայեանի եւ Ռուսաստանի լատինածէս կաթողիկէներու թեմի առաջնորդական փոխանորդ Հ. Կիրիլ վրդ. Գարբունովի:
Սրբազան Հայրը Մոսկուայի Հայ կաթողիկէ հաւատացեալներուն փոխանցած է իր Սուրբ Ծննդեան պատգամը, որուն առանցքը Բարի Հովիւի կերպարն է: Սուրբ Պատարագէն յետոյ կատարուած է Ջրօրհնէքի սրբազան արարողութիւնը։
Յունուար 6-ի երեկոյեան՝ կէսգիշերին, Մոսկուայի եւ Համայն Ռուսիոյ Պատրիարք Կիրիլի հրաւէրով, Արհ. Տ. Ռաֆայէլ արքեպս. Մինասեանը, Ռուսաստանի Պապական նուիրակ Արքեպիսկոպոս Չելեստինօ Միլիորէի, Ռուսաստանի լատինածէս կաթողիկէներու առաջնորդ Արքեպիսկոպոս Փաուլօ Պեցցիի և գերյ. Հ. Պետրոս ծ. վրդ. Եսայեանի հետ միասին իր աղօթական ներկայութիւնը բերած է Մոսկուայի Քրիստոս Փրկչի Մայր Տաճարին մէջ տեղի ունեցած աղօթքին եւ ապա մասնակցած են միասնական ընթրիքի՝ Կիրիլ Պատրիարքին հետ:
Յունուար 7-ին Արհ. Տ. Ռաֆայէլ արքեպս. Մինասեանը Հ. Պետրոս ծ. վրդ. Եսայեանի հետ մեկնած է Վենիով և այնտեղ Սուրբ Պատարագ մատուցանած է տեղւոյն հայ հաւատացեալներուն համար:
Յունուար 9-ին Սրբազան Հայրը Սուրբ Պատարագ մատուցանած է Սոչի քաղաքին մէջ եւ Ծայրագոյն Վարդապետի աստիճան շնորհած է Սոչիի Հայ կաթողիկէներու նորանշանակ ժողովրդապետ հոգշն. Հ. Ռաֆայէլ վրդ. Կրաւչիկին: Սուրբ Պատարագէն յետոյ Սրբազան Հայրը Սոչիի կաթողիկէ եկեղեցւոյ բակին մէջ կատարած է խաչքարի օծման կարգ:
Արհ. Տ. Ռաֆայէլ արքեպս. Մինասեանը հովուական այցելութիւն կատարած է նաև Կրասնոդար եւ Դոնի Ռոստով, ուր եւս մատուցանած է Սուրբ Պատարագ, որու ընթացքին վարդապետական գաւազան եւ լանջախաչ շնորհած է տեղւոյն Հայ կաթողիկէներու ժողովրդապետ հոգշն. Հ. Սերգեյ վրդ. Բաբաջանեանին:
Արհ. Տ. Ռաֆայէլ արքեպս. Մինասեանի Ռուսաստան կատարած հովուական այցէն յետոյ ՝ Յունուար 11-ին, Մոսկուայի քաղաքային իշխանութիւնները հրապարակած են տեղեկատուութիւն՝ ըստ որուն Մոսկուայի քաղաքապետարանի Քաղաքաշինական-հողային հարցերու յանձնաժողովը հաւանութիւն տուած է Մոսկուայի Հայ կաթողիկէ համայնքին յանձնելու հողատարածք՝ եկեղեցու կառուցման համար: Հողատարածքը Մոսկուայի հարաւային Բուտով շրջանին մէջ է եւ կը կազմէ 0,7 հա: Յանձնաժողովի քարտուղար Անաստասիա Պիոտվան այս մասին ըսած է որ «0,7 հա հողատարածքը կը տրամադրուի Հայ Կաթողիկէ Եկեղեցւոյ Սուրբ Գրիգոր Լուսաւորիչ ժողովրդապետութեան՝ 9 տարի անհատոյց օգտագործման իրաւունքով՝ եկեղեցւոյ եւ հոգեւոր-մշակութային կեդրոնի նախագծման եւ կառուցման համար»: Եկեղեցւոյ ընդհանուր մակերեսը կրնայ կազմել մինչև 1000 քառ. մեթր, իսկ հոգեւոր կեդրոնը՝ մօտ 850 քառ. մեթր: Նոր կառուցուելիք եկեղեցին կը հանդիսանայ Մոսկուայի առաջին Հայ կաթողիկէ եկեղեցին՝ ողջ պատմութեան ընթացքին:
Ըստ պաշտօնական տուեալներու ներկայիս Մոսկուայի մէջ կ’ապրին շուրջ 500 հայ կաթողիկէ ընտանիք, իսկ ամբողջ Ռուսաստանի մէջ Հայ կաթողիկէներու թիւը մօտ 100.000 է: