Ինչպէս կը յայտնէ ռուսական Gaudete.ru լրատուամիջոցը, 2018-ի ապրիլի 21-ին Սան Փեթերզպուրկի Եկատերինա Ալեքսանդրիյսկայա Պազիլիք կաթողիկէ եկեղեցիին մէջ, տեղւոյն հայ կաթողիկէ համայնքին համար առաջին անգամ ըլլալով մատուցուեցաւ Սուրբ Պատարագ՝ հայկական ծէսով՝ Ռուսաստանի հայ կաթողիկէներու առաջնորդական փոխանորդ, Մոսկուայի հայ կաթողիկէներու ժողովրդապետ գերյ. Հ. Պետրոս ծ. վրդ. Եսայեանի կողմէ:
Հայերը Սան Փեթերզպուրկի մէջ սկսած են բնակութիւն հաստատել քաղաքի հիմնադրման գրեթէ առաջին օրերէն: Առաջին յիշատակութիւնը այդ մասին կը թուագրուի 1708: Պաշտօնական տուեալներով, Փեթերզպուրկի մէջ այժմ կ՛ապրին մօտ 20.000 հայեր, իսկ թէ ինչքան է հայ կաթողիկէներու թիւը, առայժմ հաշուարկներու և վերլուծութիւններու կարիք ունի, ըսած է Հ. Պետրոս ծ. վրդ. Եսայեանը, որ այժմ կ՛աշխատի հայ կաթողիկէ համայնքը վերակազմակերպելու ուղղութեամբ: «Այս առաջին Սուրբ Պատարագն է, որ մատուցուեցաւ Փեթերզպուրկի մէջ, եւ ես յոյսով եմ, որ ասիկա կ՛ըլլայ սկիզբը՝ հայ կաթողիկէ ընտանիքներու նկատմամբ եկեղեցական մշտական հոգեւոր խնամքի» ըսած է Հայր Սուրբը:
Այժմ Ռուսաստանի մէջ կ՛ապրին մօտ 100.000 հայ կաթողիկէներ, հիմնականին մէջ Ռուսաստանի հարաւային շրջաններուն և Մոսկուայի մէջ: Ամբողջ Ռուսաստանի մէջ ներկայիս կը սպասաւորեն երեք հայ կաթողիկէ հոգեւորականներ՝ որոնք հաստատուած են Մոսկուայի, Վենիովի եւ Կրասնոտարի մէջ: