Համայնքային – Massis Magazine

ՀԱՅ ԿԱԹՈՂԻԿԷ ՆՈՒԻՐԱՊԵՏՈՒԹԵԱՆ ՆՈՐԸՆԾԱՅԱՐԱՆՆԵՐՈՒ Ա. ՀԱՄԱԳՈՒՄԱՐ

massis_admin — Tue, 31 Aug 2021 07:30:55 +0000

Ապագայ քահանաներու կազմաւորումը ներկայ ժամանակներու պահանջներուն պատշաճեցնելու նպատակով եւ հիմնուելով կղերից Տիեզերական ժողովի կողմէ 2016-ին հրապարակուած «քահանայական կազմաւորման հիմնագիծին» վրայ (Ratio fundamentalis institutionis sacerdotalis), Հայ կաթողիկէ նուիրապետութեան նորընծայարաններու Ա. Համագումարը տեղի ունեցաւ Երեւան 1-5 Օգոստոս 2021-ին, որպէս բնաբան ունենալով Ֆրանչիսկոս Սրբազան քահանայապետի 2014-ին կղերից Տիեզերական ժողովին ուղղած պատգամը՝ «պահպանել եւ խնամել կոչումները․․․ անոնք անտաշ անդամներ են» տիտղոսը։
Ժողովը սկիզբ առաւ Կիրակի, 1 Օգոստոս 2021-ին Երեւանի Ս․Գրիգոր Նարեկացի եկեղեցւոյ մէջ։ Ս․ Զոհը մատոյց թեմի առաջնորդ՝ Ռաֆայէլ Արք․ Մինասեան, մասնակցութեամբ Զմմառու Պատրիարքական կղերի միաբանութեան մեծաւոր եւ Պէյրութի թեմի փոխանորդ՝ Գաբրիէլ թ․ծ․վ․ Մուրատեանի։
Ապագայ քահանաներու կազմաւորման Ա. ժողովի աշխատանքներուն ընթացքին կարեւորութեամբ շեշտուեցաւ նոր ոգիով եւ 21-րդ դարու կեանքի դրութիւններու վրայ հիմնուելով վերարժեւորելու եւ վերակազմակերպելու քահանայական կազմաւորման աշխատանքը՝ հայ կաթողիկէ նուիրապետութեան նորընծայարաններէն ներս։
Օգոստոս 4ին, Զմմառի, Հռոմի եւ Հայաստանի երէց ժառանգաւորները իրենց տեսուչներուն հետ միասին մասնակցեցան համայնքային երիտասարդական օրերուն, որ կազմակերպուած էր Թորոս գիւղի Աղաճանեան ճամբարէն ներս։ Իսկ Օգոստոս 5-ին գլխաւորութեամբ Զմմառու Պատրիարքական կղերի միաբանութեան փոխանորդ՝ Հ. Գաբրիէլ թ.ծ.վ. Մուրատեանին եւ Հռոմի Քահանայապետական Հայ Վարժարանի մեծաւոր հօր, ժառանգաւորները ուղղուեցան դէպի Եռաբլուր իրենց յարգանքի տուրքը մատուցելու հայրենիքի զոհերուն, ապա այցելեցին Հայոց Ցեղասպանութեան յուշակոթողը, իրենց այցելութիւնը փակելով աղօթքով բոլոր նահատակներուն ու անոնց բարեխօսութիւնը խնդրելով իրենց ապագային կազմաւորման համար։

Հայաստանի Սրբոց Հրեշտակապետաց

Հոգեւոր Միացեալ Ճեմարան

«ՀԱՄԱՅՆՔԱՅԻՆ ԵՐԻՏԱՍԱՐԴԱԿԱՆ ՕՐԵՐ V» ԱՂԱՃԱՆԵԱՆ ԿԵԴՐՈՆԻՆ ՄԷՋ

massis_admin — Tue, 31 Aug 2021 07:25:59 +0000

2021 թուականի Օգոստոսի 1-5-ը Թորոսգիւղի «Աղաճանեան» կենդրոնում տեղի ունեցաւ Հայաստանի, Վրաստանի, Ռուսաստանի, Ուկրաինայի եւ Արեւելեան Եւրոպայի Հայ Կաթողիկէ Առաջնորդարանի կողմից կազմակերպուած Համայնքային Երիտասարդական օրեր V յոբելենական հոգեւոր-մշակութային ամէնամեայ հաւաքը:
Համայնքային Երիտասարդական Օրեր 5-ը մեկնարկեց Սուրբ եւ Անմահ Պատարագով, ձեռամբ Արհի. Տէր Ռաֆայէլ Արքեպիսկոպոս Մինասեանի, առընթերակայութեամբ Գերյ. Հայր Գառնիկ ծ. վրդ. Յովսէփեանի եւ Գերպ. Հայր Նարեկ վրդ. Մնոյեանի:
Սուրբ Պատարագի ընթացքում իր հայրական խօսքն ուղղեց ներկաներին Արհի. Տէր Ռաֆայէլ Արքեպիսկոպոս Մինասեան ըսելով. «Սիրելի՛ երիտասարդներ, ինձ համար մեծ մխիթարութիւն է ձեզ ունենալ եւ զգալ, որ մենք մի ընտանիք ենք կազմում եւ այդ ընտանիքի ապագան հէնց դուք էք»:
Սրբազան Հայրը իր գոհունակութիւնը յայտնեց, որ կրկին Աղաճանեան կեդրոնում տեսնում է այսքան երիտասարդների մէկտեղ հաւաքուած՝ Հայաստանի տարբեր Հայ Կաթողիկէ համայնքներից:
Ձեռնարկին ներկայ էին Հայաստանի Հայ Կաթողիկէ հոգեւորականները, Լիբանանի Այնճար գիւղի «Սուրբ Վարդարանի Տիրամայր» Հայ Կաթողիկէ ժողովրդապետութեան հոգեւոր հովիւ Գերյ. Հայր Մեսրոպ ծ. վրդ. Թոփալեանը, Շուէտիայի Հայ Կաթողիկէ համայնքի հոգեւոր հովիւ Գերյ. Հայր Յովսէփ ծ. վրդ. Պահէեանը, Հայաստանում SOS Արեւելքի Քրիստոնեաներ կազմակերպութեան անդամները:
Ֆրանչիսկոս Սրբազան Քահանայապետի կողմից ներկայացուած աւետարանական հետեւեալ մէջբերումը. «Վե՛ր կաց. ես քեզ նշանակում եմ վկայ այն բոլորի համար, որոնց մէջ ինձ տեսար» (հմմտ. Գործք Առաքելոց, 26:16) դարձաւ այս տարուայ երիտասարդական հաւաքի գլխաւոր բնաբանը:
Բացման խօսքով հանդէս եկաւ Հայ կաթողիկէ երիտասարդաց խմբի նախագահ Գերյ. Հ. Գառնիկ ծ. վրդ. Յովսէփեանը: Նա յոյս յայտնեց, որ այդ օրերի ընթացքում հնչող բանախօսութիւններն ու քննարկումները լինելու են հետաքրքիր եւ օգտակար, իսկ հանդիպման մթնոլորտը` նպաստաւոր նոր գաղափարների առաջացման եւ իրականացման համար:
Երիտասարդներին իր խօսքն ուղղեց նաեւ Լիբանանի Այնճար գիւղի «Սուրբ Վարդարանի Տիրամայր» Հայ Կաթողիկէ ժողովրդապետութեան հոգեւոր հովիւ Գերյ. Հայր Մեսրոպ ծ. վրդ. Թոփալեանը:
Օրուան աւարտին երիտասարդները միասին դիտեցին նախորդ չորս հաւաքների մասին պատմող ամփոփ տեսանիւթ, որն իր մէջ ներառում էր «Համայնքային երիտասարդաց օրեր» միջոցառման ստեղծման նախապատմութիւնը:
Երկրորդ օրուան առաջին բանախօսութիւնը վարեց Գերյ. Հ. Գառնիկ ծ. վրդ. Յովսէփեանը, ով ներկայացրեց Նորին Սրբութիւն Ֆրանչիսկոս Սրբազան Քահանայապետի պատգամը ուղղուած երիտասարդներին. «Վե՛ր կաց. ես քեզ նշանակում եմ վկայ այն բոլորի համար, որոնց մէջ ինձ տեսար» (հմմտ. Գործք Առաքելոց, 26:16):
Արժ. Տէր Յովսէփ Քհնյ. Գալստեանը բանախօսեց Սուրբ Յովսէփի մասին՝ «որպէս օրինակ հօր, աշխատաւորի եւ սրբութեան պահապանի»:
Հոգեբան-հոգեթերաբոյժ Ելենա Յովհաննիսեանը երիտասարդների հետ խօսեց վաղ պատանեկութեան, պատանեկութեան եւ երիտասարդութեան մասին:
Յաջորդ բանախօսութիւնները վարեց Գերյ. Հայր Յովսէփ ծ. վրդ. Պահէեանը, ով ներկայացրեց Հայ Կաթողիկէ Եկեղեցւոյ առաքելութիւնը Շուէտում եւ «Սուրբ Յովսէփի տիպարը՝ որպէս օրինակ երրորդ հազարամեակի երիտասարդներին»:
Յընթացս յաջորդ բանախօսութեան Գերյ. Հայր Մեսրոպ ծ. վրդ. Թոփալեանը վարեց բանախօսութիւն հետեւեալ թեմայով. «Ս. Յովսէփ Աստուածահօր խօսուն և արդիւնաւէտ լռութիւնը, որ առինքնող ու վարակիչ է»:
Երեկոյեան տեղի ունեցաւ Սուրբ Հաղորդութեան երկրպագութիւն, որին յաջորդեց մշակութային երեկոն:
Երիտասարդական հաւաքի երրորդ օրը Սուրբ եւ Անմահ Պատարագից յետոյ երիտասարդների համար կազմակերպուեց ճանաչողական այց Հայաստանի Հայ Կաթողիկէ համայնքներ: Մասնակիցները հնարաւորութիւն ունեցան տեսնելու այն համայնքները, որտեղ նրանք նախկինում չէին եղել:
Աղաճանեան կենդրոն վերադառնալուց յետոյ բանախօսութիւններ վարեցին Գերյ. Հայր Անտոն ծ. վրդ. Թոթոնճեանը՝ «Կրօնագիտութիւն», իսկ Գերպ. Հայր Եղիա վրդ. Դերձակեանը՝ «Աստուած ինձ հետ է իմ կեանքի բոլոր հանգրուաններում, քանզի Նա ինձ է սիրում» թեմաներով:
Օրուան վերջում Ապաշխարութեան խորհուրդի մասին բանախօսեցին Գերպ. Հայր Պետրոս վրդ. Մարաշլեանը եւ Տէր Արամ սրկ. Սաատօն:
«Երիտասարդաց համայնքային օրեր 5»-րդ հաւաքի չորրորդ օրուան առաջին բանախօսութիւնն էր. «Ս. Յովսէփ Աստուածահայրը Սեբաստացի Մխիթար Աբբահօր հոգեկանութեան մէջ» թեմայով, որը ներկայացրեց Գերյ. Հայր Մեսրոպ ծ. վրդ. Թոփալեանը:
Մասնակիցներին այդ օրը միացան նաեւ Իտալիայի Քահանայապետական Լեւոնեան Հայ Վարժարանի, Լիբանանի Զմմառու «Ս. Միքայէլ» Փոքր դպրեվանքի, «Իգնատիոս Մալոյեան» Մեծ Դպրեվանքի եւ Հայաստանի Սրբոց Հրեշտակապետաց Հայ Կաթողիկէ Միացեալ Հոգեւոր Ճեմարանի ճեմարանականները: Նրանք պատմեցին իրենց կոչումների մասին, թէ ինչպէս են որոշել դառնալ հոգեւորական:
Բանախօսութիւններից յետոյ հաւաքի մասնակիցները ներկայացրեցին իրենց պատրաստած խօսքը «Երիտասարդի դերը Եկեղեցում» թեմայով: Ծաւալուեց քննարկում, երիտասարդներն արտայայտեցին իրենց կարծիքները:
Երեկոյեան տեղի ունեցաւ «Համայնքային Երիտասարդական օրեր V» յոբելենական հաւաքի փակման հանդիսաւոր արարողութիւնը, որի ընթացքում կատարուեց յուշանուէրների բաշխում եւ կարկանդակի բեկանում:
Երեկոյի շարունակութիւնը համերգային ծրագիրն էր, որի ընթացքում գիւմրեցի երգիչներ՝ Էդգար Ղանդիլեանը, Անդրանիկ Աթոյեանը եւ Կարեն Աթոյեանը հանդէս եկան տարբեր կատարումներով: «Համայնքային Երիտասարդական օրեր V» յոբելենական հաւաքը աւարտուեց արդէն աւանդոյթ դարձած խարոյկով:
Գերյ. Հայր ԳԱՌՆԻԿ Ծ. Վրդ. ՅՈՎՍԷՓԵԱՆ
Փանիկի Սուրբ Աստուածածին Հայ Կաթողիկէ Եկեղեցւոյ Ժողովրդապետ,
Հայաստանի Հայ Կաթողիկէ Երիտասարդաց միութեան նախագահ

«ԵՐԻՏԱՍԱՐԴՆԵ՛Ր, ԵԿԵՂԵՑԻՆ ՁԵԶԱՆՈՎ Է ՀԱՐՈՒՍՏ»

massis_admin — Tue, 31 Aug 2021 07:20:39 +0000

Հայ Կաթողիկէ Երիտասարդաց խմբի նախագահ

Գերյ. Հ. Գառնիկ ծ. վրդ. Յովսէփեանի խօսքը

«Համայնքային Երիտասարդական Օրեր 5-րդ» փակման առիթով

Այսօր իր տրամաբանական աւարտին մօտեցաւ Հայաստանի, Վրաստանի, Ռուսաստանի, Ուկրանիայի եւ Արեւելեան Եւրոպայի Հայ Կաթողիկէ Առաջնորդարանի կողմից կազմակերպուած Համայնքային երիտասարդական օրեր V յոբելենական հոգեւոր-մշակութային միջոցառումը:

Նախ եւ առաջ, թոյլ տուէք իմ առանձնայատուկ շնորհակալութիւնը յայտնել Արհի. Տէր Ռաֆայէլ Արքեպս. Մինասեանին, ում օրհնութեամբ, անմիջական նախաձեռնութեամբ ու ջանքերով կազմակերպուեց այս հաւաքը:

Յատուկ շնորհակալութիւն հոգևոր դասին, բանախօսներին, աշխատակազմին, ձեզ՝ սիրելի՛ երիտասարդներ, իմացե՛ք, որ եկեղեցին ձեզանով է հարուստ: Եկեղեցին այնքա՜ն շատ բան ունի խօսելու երիտասարդութեան հետ, իսկ երիտասարդներն այնքա՜ն շատ բան ունեն կիսելու Եկեղեցու հետ:

Շնորհակալութիւն, որ դուք թողնելով ձեր առօրեայ գործերը, աշխատանքը եւ համայնքային կեանքը, այսօր այստեղ եք՝ մեզ հետ միասին տօնելու յոբելենական 5-րդ հաւաքը, եւ եւս մէկ անգամ վերապրելու մեր հաւատքը ի Տէր Յիսուս Քրիստոս:

Սիրելի՛ երիտասարդներ, դուք էք մեր ապագան, դուք էք կերտելու մեր վաղուան օրը, վստա՛հ ենք, որ այս հաւաքը եւս մէկ օղակ դարձաւ ձեր եւ Եկեղեցու միջեւ, էլ աւելի սերտ փոխյարաբերութիւններ հաստատելու համար:

Ինչպէս իր խօսքում նշում է Հռոմի Ֆրանչիսկոս Սրբազան Քահանայապետը. «Կեանքը՝ ամուր, վճռական, յաւերժական ընտրութիւններ կատարելու ժամանակն է: Իւրաքանչիւր մասնագիտական ընտրութիւն իր սրտում պէտք է ունենայ սրբութեան էլ աւելի խորը կոչ: Եկեղեցին, երիտասարդների հետ իր առաքելութիւնը համարում է «դարաշրջանային նշանակութեան հովուական առաջնահերթութիւն, որի մէջ պէտք է ներդնել ժամանակ, էներգիայ եւ ռեսուրսներ»:

Եկեղեցու ներդրած ժամանակի ու ռեսուրսների վառ ապացոյց են ամէնամեայ Համայնքային Երիտասարդական օրեր միջոցառումները, որոնց ընթացքում ստացած գիտելիքները, հմտութիւնները եւ միջհամայնքային կապերը պետք է ներդնեք Ընդհանրական Եկեղեցու հզօրացման եւ Քրիստոսի ճշմարիտ լոյսի և սիրոյ տարածման առաքելութեան գործում:

Մեր փորձառութիւնը միմեանց հետ կիսելով եւ միմեանց լսելով՝ մենք կարող ենք միասին անցնել Աստուծոյ նախանշած ճանապարհով՝ վկայութեամբ փառաբանելով Տիրոջը:

Սիրելի՛ ներկաներ, իսկ ի՞նչ է նշանակում լինել երրորդ հազարամեակի արշալոյսի երիտասարդ…

Երիտասարդ լինել նշանակում է ունենալ 4 կարեւոր առանձնայատկութիւն՝ էներգիա, կասկած, վստահութիւն եւ բարութիւն:

1. Էներգիա. Երիտասարդը պէտք է լինի կենսունակ եւ լեցուն էներգիայով, պատրաստ ամէն վայրկեան յաղթահարելու մարտահրաւէրները:

2. Կասկած. Կասկածը երիտասարդութեան էական հիմքն է: Կասկածն ինքնին առողջ բան է, քանի որ այն առաջացնում է դրական արժէքներ. հետաքրքրասիրութիւն, օբյեկտիւութիւն, ձեր միտքը փոխելու պատրաստակամութիւն, գիտակցութիւն այն մասին, որ մենք ապրում ենք անկատար աշխարհում:

3. Վստահութիւն. Վստահութիւնը գալիս է գիտակցութիւնից: Եթէ չէք վստահում ինքներդ ձեզ եւ ուրիշներին, երիտասարդ չէք: Առանց վստահութեան մեր կեանքը դարձնում ենք աւելի բարդ: Վստահութեան հիմքում է ընկած կեանքը:

4. Բարութիւն. Իսկապէս, Աստուած խտրականութիւն չի դնում մարդկանց միջեւ: Աստուած սէր է՝ միմիայն սէր, քանի որ «Նա Իր արեգակը ծագեցնում է չարերի եւ բարիների վրայ, անձրեւ է բերում արդարների եւ մեղաւորների վրայ» (Մտթ. 5:45):

Դժուար է Հայաստանում երիտասարդ լինելը, քանզի հայ երիտասարդի ուսերին ծանր պարտաւորութիւն է դրուած, ոչ միայն այս օրերին չլքելու հայրենիքը, այլեւ ամուր կանգնելու հայրենի հողին եւ զարգացնելու զանազան ոլորտներ՝ լինի դա տնտեսութիւն, արդիւնաբերութիւն, բժշկութիւն, մշակոյթ, թէ կրթութիւն: Ուստի՛ սիրելի երիտասարդներ, կապուած մնացէ՛ք թանկ գնով պահուած մեր հայրենի հողին:

Ամփոփելով խօսքս սիրելի՛ երիտասարդներ, կը ցանկանայի ասել հետեւեալը.

Ինչպէս Հռոմի Ֆրանչիսկոս Սրբազան Քահանայապետը 2013 թուականի Երիտասարդաց Համաշխարհային օրերին պատգամ տուեց երիտասարդներին՝ գնալու եւ աշակերտելու իրենց երկրներում, այնպէս էլ այսօր մենք, յորդորում ենք ձեզ, դառնալու այդ նոյն օրինակը, սիրելի՛ մասնակիցներ, գնացէ՛ք եւ աշակերտեցէ՛ք ձեր համայնքներում, եւ ձեր տներում: Դարձէ՛ք Քրիստոսի սիրոյ կենդանի վկաները։

ԱՐԱՄ ԳԱՐԱՏԱՂԼԵԱՆ՝ ԼԻԲԱՆԱՆԻ ԿԱԹՈՂԻԿԷ ՎԱՐԺԱՐԱՆՆԵՐՈՒ ԳՈՐԾԱԴԻՐ ՄԱՐՄՆԻ ԱՆԴԱՄ

massis_admin — Sat, 31 Jul 2021 07:35:34 +0000

Հինգշաբթի, 29 Յուլիս 2021-ին, առաւօտեան ժամը 11:30-ին, Լիբանանի Կաթողիկէ վարժարաններու կեդրոնատեղիին մէջ, տեղի ունեցաւ Լիբանանի Կաթողիկէ դպրոցներու քարտուղարութեան նոր գործադիր մարմնի անդամներու ընտրութիւնը:

Նշենք որ գործադիր մարմինը կը բաղկանայ ութ անդամներէ. չորսը՝ նշանակովի համախմբումին կողմէ այն դպրոցներուն, որոնք ամենաշատ աշակերտներ ունին, իսկ միւս չորսը՝ ընտրովի: Ընտրուած չորս անդամներէն մէկը Հայ Կաթողիկէ պատրիարքութեան ներկայացուցիչ եւ Հայ Կաթողիկէ Ս. Խաչ- Հարպոյեան Բարձրագոյն վարժարանի տնօրէն Պրն. Արամ Գարատաղլեանն է: Առաջին անգամն է որ այս գործադիր մարմնի անդամ կը նշանակուի հայ ներկայացուցիչ մը։

Նշենք նաեւ, որ Արամ Գարատաղլեան անդամ է միեւնոյն քարտուղարութեան ուսումնական յանձնախումբին եւ վերջերս նշանակուած է նաեւ Կաթողիկէ անգլիական թեքումով դպրոցներու ընդհանուր համակարգող:

Յայտնենք, որ Լիբանանի Կաթողիկէ դպրոցներու ընդհանուր քարտուղարութիւնը կը համախմբէ Լիբանանի բոլոր Կաթողիկէ համայնքներու 320 վարժարանները, որոնց աշակերտութեան թիւը կը հասնի 180.000-ի:

«ՄԱՍԻՍ» ջերմօրէն կը շնորհաւորէ իր երբեմնի աշխատակիցներէն Պր. Արամ Գարատաղլեանը եւ անոր կը մաղթէ արդիւնաշատ գործունէութիւն։

ՈՐՊԷՍԶԻ ԿՈՉԵՑԵԱԼԸ ԸԼԼԱՅ ԻՍԿԱԿԱՆ ՀՈՎԻՒ (20 ամեակ Զմմառու Վանքի Երանելի Իգնատիոս Մալոյեան Դպրեվանքի)

massis_admin — Sat, 31 Jul 2021 07:30:53 +0000

ՍԱՐԳԻՍ ՆԱՃԱՐԵԱՆ

Հայոց պատմութեան էջերը լեցուն են մշակութային, քրիստոնէական ու հոգեմտաւոր արժէքներու պահպանութեան, ընդհանրապէս հայապահպանութեան եւ Հայ ժողովուրդի գոյերթին մէջ առաջին իսկ դարերէն մինչեւ այսօր Հայ Կղերականին կատարած յաճախ վճռորոշ դերակատարութեան մասին վկայութիւններով։ Այդ դերակատարութեան բնոյթը փոխուած է պատմութեան իւրաքանչիւր ժամանակահատուածի պայմաններուն ու պահանջներուն պարտադրանքով։ Բայց չէ փոխուած նպատակը։ Որպէս իսկական հովիւ՝ իր ամենալայն առումով Եկեղեցւոյ ճամբով ծառայել ժողովուրդին՝ ի խնդիր Ազգի՝ իբրեւ Հայ եւ Քրիստոնեայ յաւերժութեան։
Հայ հոգեւորականին վիճակուած այս պատմական առաքելութեան ջահը ճանապարհորդած է դարէ դար ու փոխանցուած է սերունդէ սերունդ շնորհիւ ազգապահպանման գործին մէջ Հայ Եկեղեցւոյ ու Հայ Կղերին վերապահուած պատասխանատուութեան կարեւորութեան Հայ ժողովուրդի գիտակցութեան։ Այս գիտակցութեամբ է որ Ազգին հոգեւոր եւ նաե՛ւ աշխարհական առաջնորդներուն առաջնահերթ մտահոգութիւններէն մէկը եղած է (պէտք է ըլլայ) կոչումներու խնդիրը, այլ խօսքով նոր հոգեւորականներու յայտնութիւնը եւ կազմաւորումը։ Այս մտահոգութիւնը աւելցած է մանաւանդ վերջին տարիներուն, եւ աւելի քան երբեք այսօր, որովհետեւ բերքի ծաւալին յարաճուն աճը զգալի դարձուցած է մշակներուն սակաւութիւնը։ Արդարեւ, տարիէ տարի բերքին ծաւալը եւ մշակներուն թիւը կ՛աճին հակադարձ համեմատութեամբ։ Մշակներու թիւին անբաւարարութիւնը պատճառ կը դառնայ որ տարուէ տարի աւելնայ թիւը այն մարդոց եւ յատկապէս երիտասարդներու, որոնք կը հետամտին ամբողջական այլասերման առաջնորդող օտարամուտ բարքերու, հեշտակեաց եւ հաճոյամոլ կեանքի, կը հեռանան իրենց արմատներէն, կը դառնան անտարբեր ազգային, քրիստոնէական, բարոյական արժէքներուն հանդէպ եւ աստիճանաբար կ’աղաւաղեն Ազգին դիմագիծը իրենց շրջապատէն ներս։ Այս պատճառով ալ, Հայ Եկեղեցին իր յատուկ ուշադրութեան եւ հոգածութեան առարկան դարձուցած է այս մշակներու պատրաստութեան լծուած հաստատութիւնները, որոնք կը կոչուին դպրեվանքեր։
Դպրեվանքերը սովորական կամ դասական հասկացողութեամբ ուսումնարաններ չեն։ Անոնք կոչուած են պատրաստելու եւ Ազգին մատուցանելու իրենց ամենալայն հասկացողութեամբ քրիստոնեայ մարդու եւ գիտակից Հայու տիպարներ։ Հոն է որ կը դարբնուին քրիստոնէական եւ ազգային արժէքներու կատարեալ գիտակցութեամբ օժտուած եւ այդ արժէքները տարածելու, Ազգին եւ Եկեղեցւոյ զաւակները այդ արժէքներով թրծելու կոչուած ապագայ քաջակորով Հովիւները, զորս կարելի չէ բաղդատել ժողովուրդին աշխարհական առաջնորդներուն հետ։
Բազմաթիւ են ու բազմատեսակ ազգ ու ժողովուրդ առաջնորդելու կոչուած անսքեմ հովիւները, ընտրեալ կամ պարտադրուած, ինքնակոչ կամ հովանաւորեալ, արժանաւոր կամ նոյնիսկ անարժան, բայց բոլոր պարագաներուն տակ անշահախնդրօրէն ամբողջ հօտին պատկանող եւ հօտին անխտիր իւրաքանչիւր անդամը յուզող խնդիրներով տագնապող։ Յամենայն դէպս, ինչպիսին ալ ըլլան անոնք չեն կրնար բաղդատուիլ հաւատացեալ ժողովուրդը հովուելու կոչուած հոգեւոր առաջնորդներուն հետ, որոնք Աստուծոյ Հօտին Հովիւը ըլլալու կոչումը ստացած են։ Ասոնք անհամեմատելի են։ Որովհետեւ, այդ կոչումը պատահական մարդու չի տրուիր։ Այդ կոչումի թեկնածուն պէտք է օժտուած ըլլայ այնպիսի ընդոծին շնորհներով եւ ապա ինքզինք օժտէ այնպիսի հոգեմտաւոր արժանիքներով, որ հօտը զինք իրաւամբ համարէ իր քաջակորով Հովիւը, անոր մէջ տեսնէ անձնուրաց, անբասիր, անշահախնդիր եւ իմաստուն առաջնորդը, եւ այս բոլորէն առաջ եւ վեր Աստուծոյ, Եկեղեցւոյ եւ ժողովուրդի խոնարհ ծառան, որուն կրնայ ապաւինիլ։
Այդ ծառայութեան նուիրուելու առաջադրանքով դպրեվանքի նստարաններուն վրայ կամ անոր մատուռին մէջ իր ստացած մտային պաշարը ու հոգեւոր հարստութիւնը ժողովուրդի ծառայութեան մէջ դնելու, աւետարանելու, քարոզելու, բարոյախօսելու կամ յորդորելու համար, ապագայ Հովիւը դառնալու կոչուած ժառանգաւորը կարիքը ունի նաեւ տիրապետելու իր հոգեմտաւոր պաշարը հանրամատչելի դարձնելու եւ իրեն վստահուած ժողովուրդին հետ հաղորդակցելու միջոցներուն, որոնք բազմաթիւ են այսօր՝ շնորհիւ ժամանակակից արհեստագիտութեան։ Այդ միջոցները իրեն համար ժամանցային կամ զբօսանքային առարկաներ չեն, պէտք չէ՛ ըլլան։
Այս բոլորով հանդերձ, ընդհանրապէս հոգեմտաւոր ուսումնառութիւնը եւ Եկեղեցւոյ ուսուցումները բաւարար չեն արդարացնելու համար աստուածաշնորհ կոչումը, եթէ կոչեցեալը չտոգորուի եւ չառաջնորդուի իր առաքելութիւնը պսակող այն գիտակցութեամբ որ «քահանան պէտք չէ հետամուտ ըլլայ փողին» եւ որ «քահանաները չեն կրնար ըլլալ գործարարներ» ինչպէս ըսաւ Ֆրանչիսկոս Սրբազան Քահանայապետը, Աղօթքի 58-րդ համաշխարհային օրուան առթիւ Սուրբ Պետրոսի տաճարին մէջ գլխաւորած ինը սարկաւագներու քահանայական ձեռնադրութեան Սուրբ Պատարագի ընթացքին արտասանած քարոզին մէջ: Ան ըսաւ որ քահանայութիւնը «ասպարէզ չէ, այլ ծառայութիւն» եւ որ «քահանաները պէտք է մօտիկութիւն, քնքշութիւն եւ կարեկցանք ցուցաբերեն իրենց վստահուած հօտին նկատմամբ»։ Այն ինչ որ ըսաւ Պապը կը նշանակէ նաեւ որ քահանային ստանձնած կամ անոր վստահուած պարտականութիւնները չեն կրնար ժամանցային ըլլալ, այլ կ՛ենթադրեն պատասխանատուութիւն եւ յանձնառութիւն։
Անկախ այն բոլոր հոգեմտաւոր գիտելիքներէն եւ Եկեղեցւոյ ուսուցումներէն զորս բարձրագոյն ուսումնարաններու կամ դպրեվանքերու նստարաններուն վրայ պիտի ամբարէ քահանայութեան թեկնածուն, ան «յաւիտեան քահանայ» եւ իսկական հովիւ դառնալու համար բոլոր վիճակներուն մէջ, հեռու աշխարհիկ կեանքի բարքերէն, պէտք է գործէ ժողովուրդին ծառայութեան նուիրուելու գիտակցութեամբ՝ արդարացնելու համար իր կոչումը։ Անոր օրինակը պէտք է մանաւանդ վարակիչ ըլլայ իր շրջապատէն ներս, որպէսզի զինք շրջապատող նոր սերնդականներ ուզեն օրին մէկը իրեն նմանիլ, իրեն նման դառնալ Եկեղեցւոյ ճամբով ազգին եւ ժողովուրդին ծառայութեան նուիրեալներ, զգա՛լ այս առաքելութեան նուիրուելու աստուածակոչ ձայնը, կոչումը։

11 / 05 / 2021

19 Յուլիս 2021. Ի ՏԷՐ ՀԱՆԳՉԵՑԱՒ ՀԱՅՐ ԳԷՈՐԳ Ծ. ՎՐԴ. ՇԱՀՊԱԶԵԱՆ

massis_admin — Sat, 31 Jul 2021 07:15:30 +0000

ԿՈՄԻՏԱՍ Ա. ՔՀՆՅ. ՏԱՏԱՂԼԵԱՆ

Երկուշաբթի, 19 Յուլիս 2021, առաւօտեան, Հ. Գէորգ երկարատեւ ու համբերատար հիւանդութենէն վերջ եկեղեցւոյ Ս. Խորհուրդներով զօրացած՝ հոգին յանձնեց իր Արարիչին:
Հ. Գէորգ վարդապետ ծնած է Հալէպ 1945-ին: Պատանի տարիքին զգալով իր մէջ քահանայական կոչումը կը մեկնի Լիբանան, Զմմառու դարաւոր վանքը, ապա Հռոմ Հայ Կաթողիկէ Լեւոնեան Քահանայապետական Ճեմարանը շարունակելու իր բարձրագոյն ուսումները:
1972-ին, յաջողութեամբ աւարտելով փիլիսոփայական եւ աստուածաբանական ուսումները քահանայապետական Գրիգորեան Համալսարանէն, կը վերադառնայ ծննդավայրը Հալէպ, եւ նոյն տարին Յուլիսի 16-ին, կուսակրօն Քահանայ կը ձեռնադրուի ձեռամբ՝ Արհի. Գէորգ Արք. Լայէքեանի, առաջնորդ Բերիոյ Թեմի Կաթողիկէ Հայոց, օծակից ունենալով՝ Գէորգ Սարկաւագ Զապարեանը:
Նորօծ Հ. Գէորգ Վարդապետ, հաւատքով ու մեծ եռանդով կը սկսի իր առաքելութիւնը հիմք ունենալով Յիսուսի խօսքերը. «Գացէք, աշակերտեցէք բոլոր ազգերը, մկրտեցէք զանոնք Հօր եւ Որդւոյ եւ Ս. Հոգւոյն անունով: Սորվեցուցէք անոնց պահել ինչ որ պատուիրեցի ձեզի» Մատթ. 28/19-20:
Հայր Գէորգ Վարդապետ տասնեակ տարիներ անխոնջ նուիրումով կը քահանայագործէ Ս. Փրկիչ–Վարվառիա եկեղեցւոյ մէջ, որպէս ժողովրդապետ: Առ ի քաջալերանք՝ 1983-ին կը ստանայ Գերյարգելիական տիտղոս, վարդապետական գաւազան եւ մատանի, ձեռամբ՝ Պատրիարքական Կառավարիչ Արհի. Անդրէաս Եպս. Պետողլեանի:
Լուսահոգի Հ. Գէորգ Վարդապետ տարիներ կը ծառայէ Հայ Կաթողիկէ Ս. Գրիգոր Լուսաւորիչ (Էլ Իման) Ճեմարանէն ներս, գործակից ունենալով Հ. Պետրոս Վրդ. Միրիաթեանը` այժմու Բերիոյ Հայ Կաթողիկէ եկեղեցւոյ Առաջնորդ:
1988-ին, անողոք հիւանդութիւնը (Լիբանանի մէջ ծանր գործողութեան ենթարկուելուն հետեւանքով) կը մարէ իր մէջ եռանդն ու նուիրումը անդամալուծելով իր ոտքերը` կեանքը: Սակայն ան այս դժբախտութիւնը կրցաւ յաղթահարել Քրիստոսի հանդէպ ունեցած հաւատքով, յոյսով ու սիրով. նշանաբան առնելով Մեծ Վարդապետին խօսքերը. «Եթէ մէկը ուզէ իմ ետեւէս գալ՝ թող ուրանայ իր անձը եւ իր խաչը առնէ ամէն օր եւ հետեւի ինծի» Ղուկաս 9/23:
Որպէս քաջալերանք, Արհի. Պետրոս Արք. Միրիաթեան, Առաջնորդ Բերիոյ Թեմի Կաթողիկէ Հայոց, 1995-ին, աշխատանքի կը հրաւիրէ զինք, վերանուանելով՝ Ժողովրդապետ իր շատ սիրելի Ս. Փրկիչ եկեղեցւոյ: Կը Նշանակուի Հոգեւոր Վարիչ թէ «Հաւատք եւ Լոյս» Զուարթնոց Թերաճ Մանուկներու Խմբակին եւ թէ Հայ Կաթողիկէ Աղքատախնամ Միութեան:
1996-ին, Ս. Փրկիչ եկեղեցւոյ մէջ կը հիմնէ Ս. Հոգիի եղբայրութիւնը:
1997-ին, կը տօնէ իր քահանայական ձեռնադրութեան 25 ամեակը գոհաբանական Ս. Պատարագով Ս. Փրկիչ եկեղեցւոյ մէջ, հանդիսապետութեամբ՝ Արհի. Տ. Պետրոս Արք. Միրիաթեանի, որ Պատարագի աւարտին զինք կը պատուէ Լանջախաչով մը:
2004 թուականին Արհի. Գերապայծառ Տէրը զինք կը նշանակէ Առաջնորդական Ընդհանուր Փոխանորդ զոր կը վարէ հաւատարմութեամբ մինչեւ իր կեանքին վերջին օրերը:
Լուսահոգի Հայր Գէորգ իր վախճանումէն երեք օրեր առաջ հիւանդանոցին մէջ տօնեց իր քահանայական ձեռնադրութեան 49 ամեակը, որուն 33 տարիները խաչեալ, աթոռակի վրայ աղօթեց, գործեց տառապելով. Տքնեցաւ ապրեցաւ ճշմարիտ խաչին խորհուրդը, ի խնդիր Աստուծոյ փառքին եւ հոգիներու փրկութեան, իր ամբողջական գիտակցութեամբ, անձնուիրումով եւ անսպառ առաքելութեամբ:
Լուսահոգի Գերյարգելիին թաղման արարողութիւնը տեղի ունեցաւ, Չորեքշաբթի, 21 Յուլիս 2021, առաւօտեան ժամը 11-ին, Մայր Օգնութեանց Աթոռանիստ եկեղեցւոյ մէջ, հանդիսապետութեամբ՝ Հայ Կաթողիկէ Պատրիարքական Կառավարիչ՝ Արհի. Տ. Պետրոս Արք. Միրիաթեանի` Առաջնորդ Բերիոյ Թեմի Կաթողիկէ Հայոց:
Արարողութեան ներկայ էին հայ եւ քրիստոնեայ բոլոր Համայնքապետերը, վարդապետներ, Մայրապետներ, վախճանեալին հարազատները, պետական պատկան մարմնի ներկայացուցիչներ, եկեղեցական-ազգային, բարեսիրական, կրթական, մշակութային, մարզական միութիւններու ներկայացուցիչներ եւ հաւատացեալներու հոծ բազմութիւն մը:
Յուղարկաւորութեան արարողութեան աւարտին՝ վախճանեալ Գերյարգելիին մարմինը հանգչեցաւ եկեղեցւոյ յատուկ դամբարանի մը մէջ:
ԽՈՒՆԿ ՈՒ ԱՂՕԹՔ ԻՐ ՅԻՇԱՏԱԿԻՆ

ՄԱՄԼՈՅ ՀԱՂՈՐԴԱԳՐՈՒԹԻՒՆ

massis_admin — Wed, 30 Jun 2021 08:08:36 +0000

Հայ Կաթողիկէ Եկեղեցւոյ Պատրիարքական Նուիրապետութեան Հայրերը, որոնք՝ յետ առ Տէր փոխման երջանկայիշատակ Տ․Տ․ Գրիգոր Պետրոս Ի․ Կաթողիկոս Պատրիարքի Կաթողիկէ Հայոց Տանն Կիլիկիոյ՝ հաւաքուեցան, 22 Յունիս 2021 թուականէն սկսեալ, Պատրիարքական Աթոռ՝ Զմմառու Տիրամօր Վերափոխման պատմական վանքին մէջ ընտրական Սիւնհոդոսի համար, այսու կը յայտարարեն հանրութեան որ, առ այսօր, ընտրութիւնը տակաւին չէ իրականացած։

Յետ տասնհինգօրեայ այս առաջին հանգրուանին, գործընթացը պիտի վերսկսի յաջորդելիք հանգրուանին մինչեւ ցնոր տնօրինում։

Հայ Կաթողիկէ Պատրիարքութեան Դիւանը տեղեակ պիտի պահէ հանրութիւնը յաջորդական զարգացումներու մասին։

ԴԻՒԱՆ

ՀԱՅ ԿԱԹՈՂԻԿԷ ՊԱՏՐԻԱՐՔՈՒԹԵԱՆ

Զմմառ, 07 Յուլիս 2021

ՄԱՄԼՈՅ ՀԱՂՈՐԴԱԳՐՈՒԹԻՒՆ

massis_admin — Wed, 30 Jun 2021 08:00:11 +0000

Հայ Կաթողիկէ Եկեղեցւոյ Սիւնհոդոսական Հայրերը, որոնք համախմբուած են Պատրիարքական Աթոռ՝ Զմմառու հնադարեան վանքին մէջ, ընտրելու համար յաջորդը Երջանկայիշատակ Գրիգոր Պետրոս Ի. Կաթողիկոս Պատրիարքին, իրենց հայեացքը կ’ուղղեն դէպի Վատիկան, ուր Սրբազան Քահանայապետ՝ Ֆրանչիսկոս Պապին շուրջ հաւաքուած են Լիբանանի քրիստոնեայ Համայնքապետերը, եւ յաջողութիւն կը մաղթեն իրենց կատարելիք աշխատանքներուն, խորհրդակցութիւններուն եւ ջանքերուն՝ ի նպաստ Լիբանանի քաղաքական, ընկերային եւ տնտեսական տագնապներուն լուծման:
Եւ մինչ Ժողովական Հայրերը կը յայտնեն իրենց ցաւը ներկայ չգտնուելու Վատիկանի հաւաքին, ընտրական Սիւնհոդոսի ընթացիկ աշխատանքներուն պատճառով, անոնք կը յորդորեն համայն լիբանանցիները՝ աղօթքով եւ պահեցողութեամբ ընկերանալու իրենց Համայնքապետերուն՝ Հինգշաբթի 1 Յուլիսին, ի նպաստ Լիբանանի մէջ քաղաքացիական համերաշխութեան եւ բարօրութեան հաստատման:

ԴԻՒԱՆ
ՀԱՅ ԿԱԹՈՂԻԿԷ ՊԱՏՐԻԱՐՔՈՒԹԵԱՆ
Զմմառ, 01 Յուլիս 2021

ԱՂԱՃԱՆԵԱՆ ՍՐԱՀԻ ԲԱՑՈՒՄ ՓԱՆԻԿԻ ՄԷՋ

massis_admin — Wed, 30 Jun 2021 07:15:07 +0000

Կիրակի 13 Յունիս, 2021, Երրորդ զկնի Պենտեկոստէի. Փանիկի Սուրբ Աստուածածին Հայ Կաթողիկէ Եկեղեցւոյ կից լսարանի շէնքի երկրորդ յարկին տեղի ունեցաւ Աղաճանեան Սրահի պաշտօնական բացման արարողութիւնը, նախագահութեամբ Հայաստանի, Վրաստանի, Ռուսաստանի, Ուկրաինայի եւ Արեւելեան Եւրոպայի Հայ կաթողիկէ թեմի Առաջնորդ՝ Արհի. Տէր Ռաֆայէլ Արք. Մինասեանի, ԱՄՆ եւ Քանատայի Հայ կաթողիկէ թեմի Առաջնորդ՝ Արհի. Տէր Միքայէլ Եպս. Մուրատեանի, ինչպէս նաեւ Գերյ. Հայր Գառնիկ ծ. վրդ Յովսէփեանի:
Սրահի բացմանը ներկայ էին Հայր Անտոն ծ. վրդ. Թոթունճեան, Վիեննայի Մխիթարեան Միաբան՝ Հայր Նարեկ վրդ. Տատուրեան, Աշոցքի Տիրամայր Նարեկի հիւանդանոցի վարչական մասի տնօրէն Հայր Մարիօ վրդ. Կուկարելլօ, Հայկական Կարիտաս Բարեսիրական Հասարակական Կազմակերպութեան տնօրէն Գագիկ Տարասեան, Հայաստանի մէջ SOS Արեւելքի Քրիստոնեաներ ընկերութեան ղեկավար Քորանթեն Քլերկ՝ կամաւորներու հետ միասին, Շիրակի փոխ մարզպետ Դաւիթ Սեխլէեան, Փանիկ համայնքի ղեկավար Վարդան Մակէեան, բազմաթիւ հիւրեր եւ փանիկցիներ, որոնք մեծ ուրախութեամբ եկած էին մասնակից դառնալու բացման այս գեղեցիկ արարողութեան:
Կարմիր ժապաւէնը կտրելէ անմիջապէս ետք տեղի ունեցաւ նորակերտ սրահի օրհնութեան կարգը:
Օրուան հանդիսավար Սեդա Քալաշեան ներկայացուց Աստուծոյ Ծառայ Կարդինալ Աղաճանեանի կեանքի պատմութիւնէն գլխաւոր մի քանի դրուագներ, որուն յաջորդեց Գերյ. Հայր Գառնիկ ծ. վրդ Յովսէփեանի խօսքը.
«Խորին երախտագիտութիւն կը յայտնեմ Տիրոջը եւ բոլոր բարերարներուն, որոնց շնորհիւ կարողացանք աւարտին հասցնել այս ծրագիրը: Իմ առանձնայատուկ երախտիքի խօսքը կ’ուզեմ յղել Արհիապատիւ Տէր Ռաֆայէլ Արքեպիսկոպոս Մինասեանին, իր հայրական օրհնութեան եւ աջակցութեան համար, ինչպէս նաեւ Լեհաստանի եպիսկոպոսաց համաժողովի Արեւելեան Եկեղեցիներու օգնութեան բաժնի տնօրէն՝ Գերապատիւ Հայր Լեշէք վրդ. Կրիշային, Սոչիի Հայ կաթողիկէ Սուրբ Խաչ Եկեղեցւոյ ժողովրդապետ՝ Գերյ. Հայր Ռաֆայէլ ծ. վրդ. Կրաւչիկին, SOS Արեւելքի Քրիստոնեաներ ֆրանսական կազմակերպութեան Հայաստանի ներկայացուցչութեան, արտասահման գտնուող Փանիկ համայնքի բարեպաշտ զաւակներուն՝ գլխաւորութեամբ Մանուկ Բդոյեանի եւ Վարդան Կարապետեանի: Միայն ձեր բոլորի աջակցութեան շնորհիւ հնարաւոր եղաւ իրականութիւն դարձնել «Աղաճանեան» սրահի ստեղծման գաղափարը, որը թոյլ կու տայ հոգեւոր եւ աշխարհիկ տարբեր միջոցառումներ եւ արարողութիւններ իրականացնել, եւ այժմ, սրահը պատրաստ է իր ծառայութիւնները մատուցելու համայնքին:
« Կը հայցենք Աստուծոյ Ծառայ Կարդինալ Աղաճանեանի բարեխօսութիւնը բոլոր ներկաներու եւ հայ ժողովուրդի բարօրութեան եւ մեր երկրի սահմաններու խաղաղութեան համար»:
Ներկաներուն իր հայրական խօսքը ուղղեց թեմի Առաջնորդ՝ Արհի. Տէր Ռաֆայէլ Արք. Մինասեան.
«Ուրախ եմ այսօր ձեր մէջ գտնուելու համար, կ’ուզեմ իմ խորին շնորհակալութիւնը յայտնել բոլոր բարերարներուն, որոնց նուիրատուութիւններուն շնորհիւ այսօր բացուեցաւ Աղաճանեան սրահը:
«Կ’ուզեմ պատկեր մը դնել ձեր դիմաց, ըսելով հետեւեալը. «Այն մոմը, որ այսօր կը վառենք՝ մնայ միշտ վառ, որպէսզի ասիկա յանկարծ չըլլայ միայն հանդիսութիւն, որմէ մոռնանք ամէն ինչ»:
«Կարդինալ Աղաճանեանը սիրուած էր ամէն տեղ, սիրուած բոլոր երկիրներու մէջ, կրնամ ըսել, որ Կարդինալ Աղաճանեանը ամբողջ աշխարհին յայտնի էր իր համեստութեամբ, խոնարհութեամբ, սրբութեամբ, պարզութեամբ եւ իր կարողութեամբ: Չկայ մէկը, որ չճանչնար ու չգնահատէր Իր կատարած մեծ աշխատանքը»:
Սրբազան Հայրը յիշեց իր ուսումնական տարիներուն Ծիրանաւորի հետ կապուած յուշերէն։ «Այս մարդը հոգեւոր մարդ է, սուրբ մարդ է, մենք ապրած ենք անոր հետ, մենք կարող ենք վկաները դառնալ անոր սրբակենցաղ կեանքին»:
«Սիրելիներս կը մաղթեմ, որ դուք էլ անոր օրհնութեամբ աճիք ու մեծնաք»:
Խօսք առաւ նաեւ ԱՄՆ եւ Քանատայի Հայ կաթողիկէ թեմի Առաջնորդ՝ Արհի. Տէր Միքայէլ Եպս. Մուրատեան.
«Սիրելիներս, այսօր ես շատ ուրախ եմ, որ կը գտնուիմ այստեղ: Կը յիշեմ Փանիկ գիւղի առաջին հոգեւոր հովիւ Տէր Կոմիտաս վրդ. Մանուկեանը, որ 1991-ին եկած էր Հայաստան եւ այդ դժուարին տարիներուն կ’ուզէր վերականգնել այս կեդրոնը: Իր նպատակն էր այսպիսի մի սրահ ստեղծել: Այսօր ձեր ժողովրդապետը իրականացուց առաջին հովիւին փափաքը: Հայր Գառնիկ յաջողութիւն կը մաղթեմ ձեր առաքելութեան»:
Երախտագիտութեան խօսքերով հանդէս եկան նաեւ Շիրակի փոխմարզպետ Դաւիթ Սեխլէեան, ինչպէս նաեւ Փանիկ համայնքի ղեկավար Վարդան Մակէեան:
Ընթացս միջոցառման Գերյ. Հայր Գառնիկ ծ. վրդ Յովսէփեան յուշանուէրներ յանձնեց Արհի. Տէր Ռաֆայէլ Արք. Մինասեանին, Արհի. Տէր Միքայէլ Եպս. Մուրատեանին, ինչպէս նաեւ SOS Արեւելքի Քրիստոնեաներ ընկերակցութեան ղեկավար պրն. Քորանթեն Քլերկին եւ ռուսաստանաբնակ բարերար Մանուկ Բդոյեանին:
Արհի. Տէր Ռաֆայէլ Արք. Մինասեան Փանիկ համայնքի Հայ Կաթողիկէ Աղաճանեան սրահի վերանորոգման աշխատանքների աջակցելու համար օրհնութեան գտրեր յանձնեց SOS Արեւելքի Քրիստոնեաներ ընկերակցութեան, Լեհաստանի եպիսկոպոսաց համաժողովի Արեւելեան Եկեղեցիներու օգնութեան բաժնի տնօրէն՝ Գերպ. Հայր Լեշէք վրդ. Կրիշացին, Սոչիի Սուրբ Խաչ Հայ կաթողիկէ եկեղեցու ժողովրդապետ Գերյ. Հայր Ռաֆայէլ ծ. վրդ. Կրաւչիկին, Շիրակի մարզի Փանիկ համայնքի բարեպաշտ զաւակներ՝ Վահագն Բաղդասարեանին, Վաչագան Ճավռշեանին, Վարդան Կարապետեանին, Մանուկ Բդոյեանին, Փանիկ համայնքի ղեկավար Վարդան Մակէեանին, ինչպէս նաեւ Լոռու մարզի Դսեղ համայնքի բարեպաշտ զաւակ Արմէն Սարգսեանին:
Միջոցառման աւարտին հոգեւոր դասը միասին կտրեցին տօնական կարկանդակ, ապա Փանիկի Արուեստի դպրոցի երաժշտական բաժնի սաներու կողմէն հնչեց Կոմիտասի «Շողեր ջան» եւ Ռոմանոս Մելիքեանի «Վարդը» ստեղծագործութիւնները:
Փանիկի Հայ կաթողիկէ համայնքը իր յատուկ շնորհակալութիւնը կը յայտնէ Փանիկի բարեպաշտ զաւակ Նարինէ Սարգսեանին գեղեցիկ ֆուրշետ պատրաստելու համար:

Գերյ. Հայր ԳԱՌՆԻԿ Ծ. Վրդ. ՅՈՎՍԷՓԵԱՆ
Փանիկի Սուրբ Աստուածածին Հայ Կաթողիկէ Եկեղեցւոյ Ժողովրդապետ,
Հայաստանի Հայ Կաթողիկէ Երիտասարդաց միութեան նախագահ

ՄԱՀԱԶԴ

massis_admin — Mon, 31 May 2021 08:05:41 +0000

Հայ Կաթողիկէ Եկեղեցւոյ Սիւնհոդոսական Հայրերը
Հայ Կաթողիկէ Պատրիարքութիւնը,
Լիբանանի Կաթողիկէ Պատրիարքներու
եւ Եպիսկոպոսներու համաժողովը (APECL), Զմմառու Պատրիարքական Կղերի Միաբանութիւնը
եւ Ղապրոյեան ընտանիքը

կը գուժեն մահը
ԱՄԵՆԱՊԱՏԻՒ ԵՒ ԳԵՐԵՐՋԱՆԻԿ
ՏԷՐ ԳՐԻԳՈՐ ՊԵՏՐՈՍ Ի.
ԿԱԹՈՂԻԿՈՍ ՊԱՏՐԻԱՐՔԻՆ
ՏԱՆՆ ԿԻԼԻԿԻՈՅ ԿԱԹՈՂԻԿԷ ՀԱՅՈՑ

որ պատահեցաւ Երեքշաբթի, 25 Մայիս 2021-ին,
կէսօրուան ժամը 12։00-ին,
Հայ Կաթողիկէ Պատրիարքարանին մէջ։

Եկեղեցւոյ թաղման կարգը եւ յուղարկաւորութիւնը տեղի կ’ունենայ Շաբաթ, 29 Մայիս 2021-ին,
առաւօտեան ժամը 10։30-ին,
Սուրբ Գրիգոր Լուսաւորիչ – Սուրբ Եղիա
Աթոռանիստ եկեղեցւոյ մէջ։
կը փոխադրուի եւ կ’ամփոփուի
Զմմառու Պատրիարքական Կղերի Միաբանութեան Կաթողիկոս Պատրիարքներու դամբարանը։

Ցաւակցութիւնները կ’ընդունուին
● Հինգշաբթի, 26 Մայիս 2021-ին, ժամը 10:00-էն 13:00 եւ 16։00-էն 19։00,
● Ուրբաթ, 28 Մայիս 2021-ին, ժամը 10:00-էն 13:00 եւ 16։00-էն 18։00,
Հայ Կաթողիկէ Պատրիարքարանի դահլիճը։

Ուրբաթ, 28 Մայիս 2021-ին երեկոյեան ժամը 18։00-ին,
հանգստեան Սուրբ Պատարագ կը մատուցուի
Սրբոյ Կուսին Աւետման եկեղեցւոյ մէջ (Հ.Կ. Պատրիարքարան),
որմէ ետք հաւատացեալները կը հրաւիրուին վերջին հրաժեշտը տալու երանաշնորհ Հայրապետին։

Յիշատակն արդարոց օրհնութեամբ եղիցի

ԴԻՒԱՆ ՀԱՅ ԿԱԹՈՂԻԿԷ ՊԱՏՐԻԱՐՔՈՒԹԵԱՆ