Հարցազրոյց` Արհի. Հ. Ռաֆայէլ Արք. Մինասեանին հետ

Հարցազրոյց` Արհի. Հ. Ռաֆայէլ Արք. Մինասեանին հետ

«Քահանայապետի այցը Հայաստան գնահատանքի, քաջալերանքի, մխիթարութեան այցելութիւն է եւ սա առիթ կը լինի խթանելու քրիստոնէական ապրումը մեր բոլորի սրտում»:

 

Սրբազան Հայր, ո՞րն է Սրբազան Քահանայապետին Հայաստան այցելութեան նպատակը։

Եթէ Հռոմի Սրբազան Քահանայապետը գալիս է Հայաստան, նշանակում է՝ մի նպատակ կայ, մի առիթ կայ: Եթէ մեր խիղճը քննենք եւ մեր ինքնութիւնը փորձենք հասկանալ, թէ ով ենք, կը գտնենք հետեւեալը, որ որպէս հայ ժողովուրդ, հնուց մի ազգ ենք, որ հպարտութեամբ պահել ենք մեր քրիստոնէական ինքնութիւնը: Այս ինքնութիւնը որ դարերէ ի վեր ապրում ենք, դարերի ընթացքում տուել է միլիոնաւոր նահատակներ՝ վասն Քրիստոսի: Որպէս Ընդհանրական Եկեղեցու հայր եւ գլուխ, պարզ է, որ Պապը մտածում է արժեւորել մեր այս քրիստոնէական վկայութիւնը: Հետեւաբար, գնահատանք է եւ պատիւ մեզ համար, որ այսպիսի արժեւորում եւ գնահատանք է տրւում մեր ազգին եւ մեր նահատակներին, որոնց շառաւիղներն ենք մենք այսօր: Հետեւաբար, շատ բնական է, որ այսպիսի այցելութիւն է լինում այսօր: Միեւնոյն ժամանակ այս այցելութիւնը մեր յիշողութեան մէջ արթնացնում է Ֆրանչիսկոս Քահանայապետի 2015թ. ապրիլի 12-ի պատմական քայլը Հռոմի Սուրբ Պետրոսի տաճարում, որով պաշտպանեց մեր մարդկային իրաւունքը՝ հռչակելով, որ 20-րդ դարի առաջին ցեղասպանութիւնը տեղի է ունեցել հայ ժողովրդի հանդէպ: Այս այցելութիւնը նաեւ մի պատեհ առիթ է, որ մեր երախտագիտութիւնը յայտնենք Պապին եւ Կաթողիկէ Եկեղեցուն, որ այսպիսի քայլ է արել եւ անում է այսօր:

Ինչու՞ Սրբազան Քահանայապետը որոշեց այցելել Կիւմրի:

Պապի այցելութիւնը Հայաստան է, ոչ թէ միայն Կիւմրի: Հայաստանն էլ միայն Երեւանը չէ, Հայաստանը ունի շատ տեղեր՝ արժանի այցելութեան: Ոչ միայն այցելելու է Կիւմրի, այլեւ՝ Խոր Վիրապ, բնակուելու է Էջմիածնում: Կիւմրի գալը բնական մի երեւոյթ է նաեւ այլ տեսանկիւնից: Գիտէք, որ հայ կաթողիկէ առաջնորդանիստ կենտրոնը Կիւմրին է, եւ այս աթոռը վերակենդանացրել է, հաստատել է Հռոմի Սուրբ Աթոռը: Բնական է, որ Սրբազան Պապը այցելի եւ իր կաթողիկէ ժողովրդին, իր հօտին տեսնի: Սրանք նաեւ Գարեգին Բ․ Վեհափառ Հայրապետի խօսքերն են: Յոյսով եմ, որ իմ պատասխանը գոհացնելու է բոլոր հարցերը:

Կարո՞ղ է արդեօք Քահանայապետի այցելութիւնը նպաստել Կիւմրիի զարգացմանը։

Եթէ մեր կեանքում կան թերութիւններ, թող Սրբազան Քահանայապետի այս այցելութիւնը առիթ դառնայ, որ Կիւմրին աւելի զարգանայ, ինչպէս ուրիշ քաղաքներ Հայաստանում: Նախ եւ առաջ սա առիթ կը լինի խթանելու քրիստոնէական ապրումը մեր բոլորի սրտում, եւ վստահ եմ, որ շատ օգտակարութիւններ պիտի քաղենք իր պատգամից, երբ որ այն հնչեցնի քարոզի ժամանակ, բայց ես պիտի յուսայի, որ այս առիթը կանխապէս լինի մեզ համար հոգեւոր արթնացում եւ որպէսզի աւելի լրջօրէն կարողանանք ապրել մեր քրիստոնէական պատասխանատուութիւնը եւ զարգացնել հոգեւոր, բարոյական, սոցիալական արժէքները մեր ընտանիքներում:

Ի՞նչ դեր կարող է խաղալ Քահանայապետի այցը կամ պատգամը Ղարաբաղում խաղաղութեան հաստատման գործում։

Քահանայապետի այցը Հայաստան գնահատանքի, քաջալերանքի, մխիթարութեան այցելութիւն է: Ոչ միայն մեր, նաեւ Սրբազան Պապի ցանկութիւնն է, որ աշխարհում եւ մեր տարածաշրջանում խաղաղութիւն տիրի: Պապի այցելութիւնները երբեք քաղաքական բնոյթ չեն ունեցել եւ չեն ունենալու: Այնուամենայնիւ, այս այցելութիւնը կարող է կարեւոր պտուղներ ունենալ նաեւ այդ դաշտում, ինչպէս տեսանք անցած տարի, երբ ապրիլի 12-ի Քահանայապետի պատգամից անմիջապէս յետոյ Խորհրդարանը կարեւոր բանաձեւ ընդունեց Հայոց Ցեղասպանութեան դատապարտման մասին:

 

Հարցազրոյցը վարեց` Տ. Յովսէփ քհնյ. Գալստեանը